تبسيط معلومات للناس إلي ما عندها حتى فكرة على مشروع غاز تطاوين و مشروع محطة الطاقة الشمسية.
مشروع الغاز هو عبارة على محطة كبيرة تنقسم لثنين وحدات، وحدة معالجة الغاز لتوفير الغاز الطبيعي للإستعمال الصناعي و المنزلي(gaz de ville) و وحدة تعبئة الغاز المسال ( قوارير الغاز المنزلي) قصد تغطية السوق المحلية بالجنوب، موش باش ندخلو في تفاصيل تقنية للمشروع خليها في مقال آخر و إلي يهمناهو قيمة الإستثمار في المشروع و هي 150 مليون دولار أمريكي 😳😳 لا لا موش برشا على ولاية بترولية.
و أما عن مشروع محطة الطاقة الشمسية ( solar power plants) المحطة هاذي إلي من المتوقع يتم الإنتهاء من إنجازها في الأشهر القليلة القادمة و إلي يتم إنشائها على مساحة 20 هكتار المحطة تتكون من أكثر من 30 ألف لوح كهروضوئي solar panels إلي باش ينتجو أزيد من 22 جيغاواط في العام الكلام هذا يمكن ما يهمش برشا عباد و إلي يهم الناس الكل هو قيمة الإستثمار في المشروع إلي هي 10 مليون دولار أمريكي يعني تقريبا 28 مليون دينار تونسي و إذا نزيدولهم ال 150 مليون دولار قيمة الإستثمار في مشروع الغاز و إلي هي تقريبا 420 مليون دينار تونسي يولي عندنا 448 مليون دينار حسب سعر الصرف الحالي قيمة جملية للإستثمار في المشاريع هاذي إلي كيما حكينا في المقال السابق أنو المشروع على أرض قريبة من قصر المرابطين و تبعد فقط 500 متر على أحد الأحياء السكنية بالجهة و في الأخير المنطقة ترابيا تابعة لبلدية غمراسن و جهويا هي تابعة ولايتنا الحبيبة #تطاوين، الموضوع الي خلاني نكتب في هالخرم الكل هو المسؤولية الإجتماعية للشركات صاحبة هذه المشاريع في حق هذه الجهة الي كيما خرفنا سالفا لما ناخذو مثال حي الطالي القريب جدا من المشروع ما فيهش إستثمار واحد في البنية التحتية و لو بقيمة ألف دينار وإحنا قاعدين نحكو على 420 مليون دينار يا وخياني، صحيح المشروع وطني و باش يخدم عباد لكن قدرتو التشغيلية ضعيفة برشا لذلك يا شبابنا الغالي يلزم تفهم إلي راهو حقك موش مزية منهم باش يتحملو مسؤوليتهم المجتمعية.
إن شاء الله ما نكونش طولت عليكم و إن شاء الله تكونو فهمتوني و نقومو الناس الكل ليوم قبل غدوة بواجبنا و نطالبو بحقكنا يزي ما رقدنا... #مرابطون
المقال القادم في نفس الموضوع لكن باش نحكو فيه على الأمور التقنية أكثر 
